Monday, July 7, 2008

"တာနဘတ ပွဲတော်"




"ဝါးရွက်လေးတွေ ပျော့ပျောင်းသွယ်
တံစက်မြိတ်မှာ လှုပ်ခါရယ်
ကြယ်လေးတွေ လင်းလက်တောက်ပ
ရွှေ ငွေ မှုံများအလား"


ဒီနေ့ ခုနှစ်လပိုင်း ခုနှစ်ရက်နေ့ဆိုတော့ သင်တန်းမှာ "တာနဘတ"ပွဲ လုပ်တယ်။ "တာနဘတ"ပွဲက တရုတ်ပြည်က ဆင်းသက်လာတာလို့ ပြောပါတယ်။ "တာနဘတ"ပွဲတော်အကြောင်း ဘာသာပြန်ကို မနုစံဆီမှာ ဖတ်နိုင်ပါတယ်။ မနက်ပိုင်းက အတန်းမှာတော့ နားနေချိန်မှာ ဆုတောင်းစာရေးဖို့ စာရွက်နဲ့ ရောင်စုံsoftpenလိုက်ဝေတယ်။ ရေးပြီး အတန်းရှေ့က ဝါးခက်မှာ သွားချိတ်လိုက်ရုံပါဘဲ။ ညနေပိုင်းအတန်းမှာတော့ အခန်းထဲဝင်လိုက်တာနဲ့ ထိုင်ခုံတွေအကုန် ဘေးရွှေ့ထားတာ တွေ့ရတယ်။

စားပွဲတွေကို အစု၃စု စုထားပြီး တခုပေါ်မှာ "ယူခတ" ( yukata/浴衣) တွေ တင်ထားပါတယ်။ (ဓာတ်ပုံရိုက်ဖို့ မေ့သွားလို့ ပါလာတော့ဘူး။) နောက်စားပွဲပေါ်မှာ စုတ်တံ၊ မှင်သွေးကျောက်ပျဉ်နဲ့ ကျောက်တံ၊ မှင်ရည်ဘူး နဲ့ ဆုတောင်းစာရွက်တွေ တင်ထားတယ်။


(ကျမ ရေးတဲ့နေရာက ပစ္စည်းလေးတွေ)

နောက်တခုပေါ်မှာတော့ စာရွက်ခေါက်ဖို့ ရောင်စုံစာရွက်တွေ တင်ထားတယ်။ ခေါက်ဖို့ ပုံစံစာရွက်တွေလဲ တင်ထားပေးတယ်။ အဲဒါလေးတွေကြည့်ခေါက်ပြီး ဝါးခက်မှာ သွားချိတ်ဆွဲကြပါတယ်။ ပန်းပွင့်အကြီးကြီးတွေကိုတော့ ခေါင်းမှာပန်ပြီး ဓာတ်ပုံရိုက်ကြတယ်။


(သူများခေါက်ထားတဲ့ ပန်းပွင့်တွေကို ရိုက်လာတာ)

ကြိုက်နှစ်သက်တာ စလုပ်လို့ရပါတယ်။ ကျမက ဆုတောင်းစာရေးစားပွဲနဲ့နီးလို့ ဆုတောင်းစာ အရင်ရေးပါတယ်။ ဒီတစ်ခါ စုတ်တံနဲ့ ရေးရတာဖြစ်လို့ အကြမ်းအရင်ရေးကျင့်ရပါတယ်။ လေ့ကျင့်ပေမယ့်လည်း မှင်ရည်ကို မညှိတတ်တာရော စာလုံးလှအောင်မရေးတတ်တာရောနဲ့ နှစ်ရွက်မြောက်ရေးတာကိုဘဲ အတန်းရှေ့က ဝါးခက်မှာ ချိတ်လိုက်တယ်။


အင်းမ်... ဘာဆုတောင်းလဲဆိုတော့ ဒါလေးလေ မနက်ကနဲ့ အတူတူဘဲ။


(အမေ့ကိုဘဲ သတိရနေတာနဲ့ "အမေကျန်းကျန်းမာမာနဲ့ အသက်ရှည်ရှည် နေရပါစေ"လို့ ဆုတောင်းလိုက်တယ်။)

သူများတွေရဲ့ ဆုတောင်းစာရွက်တွေ လိုက်ဖတ်ဖြစ်တယ်။ အတော်များများက "မိသားစုဝင်အားလုံး ကျန်းမာပါစေ"လို့ ဆုတောင်းတဲ့သူတွေ များတယ်။ "ကိုယ့်ကလေးကို နတ်ကောင်းနတ်မြတ်များ စောင့်ရှောက်ပါစေ"ဆိုတာလည်း တွေ့ရတယ်။ ထူးထူးဆန်းဆန်း "ကြိုးစားပါ နိပွန်း! ပီကင်းအိုလံပစ်"လို့ ရေးထားသူလဲရှိတယ်။ "ထီပေါက်ပါစေ" ဆိုတာလဲ ရှိတယ်။ သူငယ်ချင်းတရုတ်မလေးကတော့ အတိအကျဘဲ "ယန်းသန်းသုံးရာထီ ပေါက်ပါစေ"တဲ့။ :D

ဆုတောင်းစာရေးပြီးတော့ "ယူကတ"ဝတ်ပြီး ဓာတ်ပုံတွေ ရိုက်ကြတယ်။ "ယူကတ"က ကီမိုနိုလို ပိတ်မထူပါဘူး။ နွေမှာဝတ်တာမို့ ချည်သားအပါးစတွေနဲ့ ချုပ်ထားတယ်။ ချုပ်ထားတာကလဲ အထည်တိုင်း လက်နဲ့ချုပ်ထားတာ။ အတော်တောင် အံ့ဩသွားတယ်။ ချည်ကိုလဲ ပိတ်သားထဲမြှုပ်ပြီး အတော်စိတ်ရှည်လက်ရှည် ချုပ်ထားတာ။ ခုနောက်ပိုင်း တချို့ "ယူကတ"တွေက စက်နဲ့ချုပ်တာတွေလဲ ရှိလာတယ်တဲ့။ အဝတ်ထက် ခါးစီး "အိုဘိ" (obi/帯)လေးတွေကို သဘောကျတယ်။ အနောက်က ဖဲပြားကို ကြိုက်တာ။ ကြာကြာတော့ ဝတ်ထားမနိုင်ပါဘူး။ အသက်ရှူကြပ်လာတယ်။


ပြီးတော့ "အိုချ" (လက်ဖက်စိမ်း ရေနွေးကြမ်း)သောက် မုန့်တွေစားနဲ့ ဆူညံဆူညံနဲ့ပေါ့။ အားလုံးပြီးသွားတဲ့အခါ "တာနဘတ"ပွဲရဲ့သီချင်းရေးထားတဲ့စာရွက်တွေဝေပါတယ်။ (အပေါ်မှာ ထင်ရာမှန်းပြီး ဘာသာပြန်ထားကြည့်တာပါ။) ကက်ဆက်သီချင်းနောက်က အားလုံးစုပေါင်းလိုက်ဆိုကြပြီး အဆုံးသတ်လိုက်ပါတယ်။

6 comments:

ဇနိ said...

ဒီနေ့ ကျောင်းလစ်တယ်။ ပွဲတော် မသွားဖြစ်လိုက်ဘူး။ ဓါတ်ပုံလေးတွေရိုက်လာတာ ကျေးဇူးနော်။ ဆုတောင်းစာတွေက အမျိုးမျိုး စိတ်ဝင်စားစရာကောင်းပ။
မဇနိ

မောင်မျိုး said...

ဲ "ယန်းသန်းသုံးရာထီ ပေါက်ပါစေ" ကျနော်လည်း အဲ့လိုဆုပဲတောင်းချင်တယ် :)

nu-san said...

အမလည်းဆုတောင်းစာချိတ်ချင်တာ။ အမတို့ ပတ်ဝန်းကျင်မှာ အဲဒီလို ပွဲမျိုးမရှိတော့ မလုပ်ရဘူးပေါ့နော်.. အမကတော့ ရန်ကုန်က မိသားစုတွေ ကျန်းမာပါစေလို့ ဆုတောင်းချင်ပါတယ်။ အထူးသဖြင့် အဖေနဲ့အမေပေါ့.. :) ဓာတ်ပုံလေးတွေနဲ့အတူ ပွဲတော်အကြောင်းလေး မျှဝေပေးတာ ကျေးဇူးပါ ညီမလေးရေ...

Taungoo said...

ကျွန်တော်လည်းလာ ဆုတောင်းစာလေးချိတ်ချင်လိုက်တာဗျာ။

ဒါနဲ့ ဝတ်စုံနဲ့ရိုက်ထားတာ အမမြလားဗျး)
ကီမိုနိုဝတ်စုံအကြောင်းလေးလည်း အလျဉ်းသင့်ရင် ရေးပါဦး သိချင်လို့ပါ

မေတ္တာဖြင့်

မြရွက်ဝေ said...

မဇနိ---> မဇနိရော ဘာများဆုတောင်းမှာပါလိမ့်! အင်းမ်... ကိုဇနိနဲ့ :P

မောင်မျိုး--->ယန်းသန်းသုံးရာထီပေါက်ရင် မောင်မျိုးတော့ ဘလော့မရေးတော့ဘဲ ဟန်းနီးမွန်းခရီးထွက်ပြီး ကမ္ဘာပတ်နေမယ်ထင်တယ်။ :)

မnu-san---> ဟုတ်တယ်အမရေ၊ မိဘကျန်းမာဖို့ဘဲ ဆုတောင်းတယ်။ ကျန်းကျန်းမာမာ အသက်တစ်ရာပေါ့။

တောင်ငူ---> နောင်နှစ်ကြုံရင် ချိတ်ပေးမယ်လေ။ ဘာဆုတောင်းချင်တာလဲ? ပုံထဲက အမပါ။ ဝတ်ထားတာ "ယူကတ"လို့ ခေါ်ပါတယ်။ ကီမိုနိုမဟုတ်ပါဘူး။ နွေရာသီမှာ ဝတ်ကြတဲ့ ချည်အပါးသား ဝတ်စုံပါ။ ကီမိုနိုတော့ မဝတ်ဖူးသေးဘူး။

diLo said...

like the kimono design!!!
its summer wear hoat?

thx for sharing so much about japan..cant wait to go there :P

  © Blogger templates The Professional Template by Ourblogtemplates.com 2008

Back to TOP