ချစ်ခင်ရိုသေ

(တစ်)

နံနက်လင်းလျှင် လင်းချင်းပင် ဆရာတော် ဦဥက္ကဝံသက ဘုန်းကြီးကျောင်းသား ကျောင်းအိပ်ကျောင်းစား ကလေး၃၀ကျော်ကို လောကုတ္တရာစာပေများကို သင်ကြားပေးတော်မူသည်။ ထို့ကြောင့် ဆရာမုန်း၏ အထက်တန်းကျောင်းသား တဝက်ခန့်သည် နံနက်ပိုင်းတွင် ဘုန်းတော်ကြီးကျောင်းသားများ ဖြစ်နေသည်ဟု ဆိုနိုင်ပေ၏။ အချို့က သင်ပုန်းကြီး၊ အချို့က မင်္ဂလသုတ်၊ အချို့က ပရိတ်ကြီး၊ သဒ္ဒါသင်္ဂြိုလ်အထိ ပေါက်ရောက်နေသူများလည်း ရှိလေသည်။ ဘုန်းတော်ကြီးကျောင်း သင်ကြားနည်း စနစ်အတိုင်း ဉာဏ်အနုအရင့်အလိုက် တစ်ဦးချင်း သင်ပေးနေသည်ကို တွေ့ရသည်။ တပုဒ်ကြေညက်မှ နောက်တပုဒ်တက်ပေးသည်။ ကြေညက်သည်ဆိုရာ၌ နှုတ်တက်အာဂုံဆောင်နိုင်၍ ကျောက်သင်ပုန်းထဲတွင် မမှားမယွင်းအောင် အလွတ်ပြန်လည်ရေးသားနိုင်ခြင်းကို ဆိုလိုသည်။ သဘောအဓိပ္ပါယ်ကို ရှင်းလင်းပြောပြခြင်းကားမရှိ။ တဦးချင်းရှင်းလင်းပြောပြနိုင်ရန်လည်း အချိန်များစွာ လိုပေလိမ့်မည်။

အတန်းကျောင်းပညာရေး၌ကား တဦးချင်းသင်ရန် မလွယ်ကူချေ။ သင်ရိုးညွှန်းတမ်း၊ လပိုင်း မာတိကာနှင့် အပတ်စဉ် မာတိကာတို့အရ အချိန်နှင့်ကိုက်ကာ သင်ကြားရသည်ဖြစ်ရာ အတန်း၏ ပျမ်းမျှဉာဏ်ရည်ကိုလိုက်၍ အစုလိုက် အတန်းလိုက် သင်ကြားမှ ဖြစ်နိုင်သည်။ ဉာဏ်ထိုင်းလွန်းသူများနှင့် ဉာဏ်ရည်ထက်မြက်လွန်းသူများကိုမူ သီးခြားအချိန်ပိုယူ၍ သီးခြားအချိန်ပိုယူ၍ တဦးချင်း သင်လျှင် များစွာအကျိုးသက်ရောက်နိုင်မည်ဟု ဆရာမုန်းတွေးမိလေသည်။

ဆရာတော်၏ နံနက်ပိုင်းစာသင်ချိန်သည် စာကျက်သံ စာအံသံတို့ဖြင့် ဆူညံနေတော့သည်။ စာကျက်သံ စာအံတို့အကြား ကြိမ်သံတရွှမ်းရွှမ်းသံကိုလည်း မကြာခဏ ကြားနေရပေသည်။ ဆရာတော်၏ ကြိမ်နှင့်မိတ်ဖွဲ့ခြင်းခံရသည့် ကျောင်းသားများမှာ မသက်သာတော့ပြီ။ တိုင်ကိုဖက်စေကာ တင်ပါးတွင် အရှိုးထင်အောင် အရိုက်ခံရရှာလေသည်။ မငိုရ၊ မျက်ရည်မကျရ။ ငိုလျှင် မျက်ရည်ကျလျှင် ကြိမ်ချက်ပိုများမည်ဖြစ်လေသည်။ သူတို့မှာ အံကြိတ်ခံရရှာလေသည်။ ဆရာမုန်း တစေ့တစောင်း အကဲခတ်ကြည့်နေမိသည်။ မငို၊ မျက်ရည်မကျသော်လည်း အချို့ကျောင်းသားများ သေးတဖြန်းဖြန်းပါသည်ကို တွေ့ရ၏။ ၈နာရီခွဲမှ ဆရာတော် စာအံပုတ်တော့သည်။ စာအံပုတ်သည်ဆိုရာ၌ ကြမ်းပြင်ကို ကြိမ်နှင့်ပုတ်ကာ စာအံခြင်းအမှု ရုပ်သိမ်းကြောင်း ကြေညာခြင်းပင်တည်း။

ကျောင်းအိပ်ကျောင်းစား ကျောင်းသားအားလုံး ဆွမ်းခံထွက်နိုင်ရန် သပိတ်၊ ကြုတ်၊ လင်ဗန်းနှင့် ဗျပ်ခွက်များ ဆေးကြောသုတ်သင်ကြရသည်။ ၉နာရီတွင် တုန်းခေါက်ကာ ရေမြက်၊ ရွာသာအေး၊ ပြည့်အိုင်၊ ညောင်ဂျစ်ပင်နှင့် မြေပန်းတောင်းရွာများသို့ လူခွဲကာ ဆွမ်းခံထွက်ကြရလေသည်။ တုန်းခေါက်သံကြားသည်ဆိုလျှင်ပင် ပတ်ဝန်းကျင်ရွာအသီးသီးမှ ဆရာမုန်းတို့ မူလတန်းကျောင်းသို့တက်မည့် ကျောင်းသူကျောင်းသားများ တဖွဲဖွဲရောက်လာကြသည်ကို တွေ့ရလေသည်။

"ဆရာမုန်းနော် ကျောင်းသားတွေကို သိပ်အလိုမလိုက်နဲ့၊ စာနဲ့ပတ်သက်လာရင် အညှာမပေးနဲ့၊ ဆော်သာဆော်၊ မကျိုးမပဲ့မကန်းရင် ပြီးရော၊ ပေါက်ပြဲရင် ကျုပ်ဆေးထည့်ပေးမယ်။ ပြဿနာ လုံးဝမဖြစ်စေရဘူး။ စိတ်ချ"
ယနေ့ ဆရာမုန်း စာသင်ခန်းသို့ စဝင်တော့မည်ဖြစ်သည်။ ထို့ကြောင့် ဆရာတော်က ရဲသွေးတင်ပေးနေခြင်း ဖြစ်လေသည်။
"စည်းကမ်းလည်း မလျော့ရဲစေနဲ့။ ကျုပ် ဆရာမကြီးကို သိပ်အားမရဘူး။ သူ့ဆိုရင် ကျောင်းသားတွေ သိပ်မလေးစားကြဘူး။ ကျုပ် ဝင်ဝင်ထိန်းပေးနေရတယ်။ ခုတော့ ဒီနေ့ကစပြီး ကျောင်းသားတွေကို ဆရာမုန်းလက်ထဲမှာ အပ်တယ်။ စည်းကမ်းနဲ့ပတ်သက်လာရင် ဆရာမုန်းတာဝန်"
"တင်ပါ့ ဘုရား"
ဆရာတော် စိတ်ကျေနပ်အောင်သာ ဝန်ခံလျှောက်ထားလိုက်ရသည်။ ဆရာမုန်း ဘဝင်မကျလှချေ။

၁၁နာရီခွဲမှာ ကျောင်းစတက်သည်။
"မင်္ဂလာပါ ဆရာ"
"မင်္ဂလာပါ တပည့်တို့၊ ထိုင်ကြပါ"
ဆရာမကြီး၏ တာဝန်ပေးချက်အရ ဆရာမုန်းသည် စလျှင်စခြင်းပင် ဒုတိယတန်း၊ တတိယတန်းနှင့် စတုတ္ထတန်းတို့ကို ကိုင်ရမည်ဖြစ်သည်။ ဆရာမုန်း၏ စာသင်ခန်းများအဖြစ် ဇရပ်တစ်ဆောင် သီးသန့်ခွဲပေးလေသည်။ ဆရာမကြီးကလည်း သူငယ်တန်း၊ ပထမတန်းကလေးများနှင့် ဇရပ်တဆောင်ပေါ်မှာ။ ဇရပ်နှစ်ဆောင်သည် မဝေးလှသော်လည်း ခပ်လှမ်းလှမ်း ဖြစ်နေ၏။

စတုတ္ထတန်းက ခုနှစ်ယောက်၊ ကိုရင်သုံးပါး၊ လူဝတ်ကြောင်တယောက်နှင့် မိန်းကလေးသုံးဦးတို့ ပါဝင်သည်။ တတိယတန်းက ၁၃ယောက်၊ ဒုတိယတန်းက ကျောင်းသား ၂၀၊ စုစုပေါင်းမှ ကျောင်းသား ၄၀သာ။ ကျောင်းသားအင်အား မများသော်လည်း အတန်း သုံးတန်းအတွက် ဘာသာရပ်တွေ များလှသည်။ တတန်းသို့ဝင်နေချိန်တွင် ကျန်နှစ်တန်းအားနေမည်။ အားနေသော နှစ်တန်းကို နိုင်အောင်ထိန်းနိုင်ရမည်။ လေ့ကျင့်ခန်းပေးထားမှ သင့်မည်။ ဘာသာရပ်တွေ မေးလွဲဖြစ်မနေအောင် အတန်းမဝင်မီကပင် ကြိုတင်စီစဉ်ထားနိုင်ရမည်ဖြစ်သည်။

လက်တွေ့ အတန်းဝင်သင်ကြားရသောအခါတွင် ကျောင်းသားများသည် ကျက်စာ၌ အားသန်နေကြသည်ကို တွေ့ရ၏။ ကျက်မှတ်ထားသည့်အတိုင်း အပုဒ်လိုက်၊ အပုဒ်လိုက်ပြန်မေးလျှင် 'သည်' '၏'မလွဲ ဖြေနိုင်ကြသည်။ သို့သော် ခွဲခြားစိတ်ဖြာမေးသည့် မေးခွန်းများကို မဖြေတတ်ကြ။ မဖြေနိုင်ကြ။ ဉာဏ်ကိုလွှာ၍ အသုံးမပြုတတ်ကြသည်ကို တွေ့ရသည်။ နဂိုက ရှိခဲ့သော ဘုန်းတော်ကြီးကျောင်း ပညာရေးစနစ်၏ အရှိန်ပါနေဟန်တူသည်။ ထိုအဖြစ်ကို ပြုပြင်ပြောင်းလဲပစ်ရန် ဆရာမုန်း၏တာဝန် ဖြစ်လာတော့သည်။

"ဟေ့....... ဟေ့.......... ဟိုနှစ်ယောက် လက်ရေးလှရေးပါဆို၊ ဘယ့်နှယ် ခဲတံချင်းပေါက်နေရတာလဲ"
ဆရာမုန်းသည် စတုတ္ထတန်းတွင် သင်္ချာတွက်ပြနေစဉ် ဒုတိယတန်းကျောင်းသားနှစ်ယောက် ခံတံချင်းပေါက်ကစားနေသည်ကို မြင်တွေ့လိုက်ရသည်။ နာမည်ကို ခေါ်ရမည်ဖြစ်ပါသည်။ သို့သော် ယနေ့မှ အတန်းစဝင်ရသည်ဖြစ်ရာ နာမည်မသိသေးသဖြင့် ဟိုနှစ်ယောက်ဟူသော နာမ်စားကို သုံးလိုက်ရသည်။ လက်တွေ့သိရှိလာရသည်မှာ ကျောင်းသားတို့သည် ဆရာ၏မျက်စေ့အောက်တွင် မခုတ်တတ်သည့်ကြောင်ပမာ စည်းကမ်းရှိစွာ ငြိမ်ဝတ်ပိပြားသော်လည်း ဆရာ့မျက်ကွယ်တွင် အလစ်ရလိုက်သည်နှင့်တပြိုင်နက် ထင်ရာကြဲတတ်သည့်စရိုက်ပင်တည်း။

စည်းကမ်းဟူသည်မှာ ကြောက်၍လိုက်နာရခြင်းထက် အသိရှိစွာလိုက်နာရခြင်းက တန်ဖိုးရှိ၍တာရှည်ခိုင်မြဲကြောင်းကို ဆရာမုန်းသိနားလည်ထားသည်။ အပြစ်ကျူးလွန်သည့် ကလေးနှစ်ယောက်မှာ မျက်နှာငယ်ကလေးတွေနှင့် ဆရာမုန်းရှေ့မှောက်သို့ လာရောက်မတ်တပ်ရပ်လာကြ၏။ ဆရာသစ်က မည်သို့အပြစ်ပေးပါမည်နည်းဟု ကြောက်ရွံ့စိုးရိမ်နေကြဟန်ရှိလေသည်။ ဆရာတော်ထားခဲ့သော ထားဝယ်ကြိမ်လုံးကလည်း စားပွဲပေါ်တွင် အသင့်ရှိနေသည်မဟုတ်ပါလော။ သူတို့ နှစ်ဦးသာမဟုတ် ဆရာမုန်းကိုင်သော ဒုတိယတန်း၊ တတိယတန်းနှင့် စတုတ္ထတန်း ကျောင်းသူကျောင်းသားအားလုံးသည် ဆရာမုန်း၏ အရိပ်အကဲကို မသိမသာ ကြည့်ရှုနေကြလေသည်။ ပထမဆုံးအကြိမ် အပြစ်ပေးရမည်ဖြစ်သဖြင့် အရေးကြီးလှသည်။ မပြောမဆို ဒေါသအလျောက် တန်း၍အပြစ်ပေးခြင်းသည် မထိရောက်နိုင်ဟု ဆရာမုန်း တွက်ဆမိလေသည်။

"မင်းနာမည်"
"ချစ်ဆွေပါခင်ဗျ"
"ကိုရင့်နာမည်ကကော"
"ရှင်သုမန အဲ... အဲ... မောင်တင်မြင့်ပါ"
အပြစ်ပေးရမည့်အထဲတွင် ကိုရင်တပါးပါ ပါလေသည်။
"ကိုရင်တို့ နှစ်ယောက်မှာ အပြစ်ရှိသလား၊ မရှိဘူးလား"
နှစ်ဦးစလုံး မည်သို့အဖြေပေးရမည်ကို စဉ်းစားနေကြဟန်ရှိသည်။
"ကျောင်းသားဆိုတာ မှန်တာကို ရဲရဲဝံ့ဝံ့ဝန်ခံရဲတဲ့ သတ္တိရှိရမယ်ကွ။ မှန်တာကို ဝန်မခံရဲတာဟာ သတ္တိကြောင် သရဲဘောနည်းသူဘဲ"
"အပြစ်ရှိပါတယ်ခင်ဗျ"
"ကျွန်တော့မှာလဲ အပြစ်ရှိပါတယ် ဆရာ"
"အေး အဲဒီလို ဝန်ခံရဲရမယ်။ မင်းတို့ အဲလေ ကိုရင်တို့အပြစ်က လက်ရေးလှရေးပါဆိုတာ မရေးဘဲဆော့နေတဲ့အပြစ်၊ စာရေးကိရိယာကို ရိုရိုသေသေ ကိုင်တွယ်သုံးစွဲရမယ့်အစား ခဲတံတွေကို အကျိုးမဲ့ ပျက်စီးစေတဲ့အပြစ်၊ နောက်ပြီး ပတ်ဝန်းကျင်က မင်းတို့ဆီ အာရုံစိုက်နေကြတော့ အလုပ်ပျက်အောင် နှောက်ယှက်တဲ့အပြစ်"

ဆရာမုန်းသည် အပြစ်ကျူးလွန်သော ကလေးနှစ်ယောက်ကို ချက်ချင်းတန်းမရိုက်သေးဘဲ စိတ်ရှည်လက်ရှည် ရှင်းလင်းပြောပြနေသည်ကို ကျောင်းသားအားလုံး အထူးတဆန်း ကြည့်နေကြသည်။ အံ့ဩနေကြသည်။
"ကိုရင်တို့ကို အပြစ်ပေးထိုက်သလား"
"ပေးထိုက်ပါတယ်ခင်ဗျ"
နှစ်ဦးစလုံးပင် အသံပြိုင်ဖြေကြလေသည်။
ဆရာမုန်းသည် ကလေးနှစ်ဦးစလုံးကို နှုတ်ဖြင့်သာ ရေလည်အောင် ပြောဆိုဆုံးမလွှတ်လိုက်မည်ဟု စိတ်ကူးမိသေးသည်။ သို့သော် ဆရာတော်၏ မိန့်ကြားချက် ရှိနေသေးရကား စတိအဖြစ်တော့ ရိုက်နှက်အပြစ်ပေးရပေတော့မည်။
"ကဲ ဒါဖြင့် မင်းတို့ကို အပြစ်ပေးရမယ်"
အပြစ်ပေးမည်ဆိုကတည်းက ချစ်ဆွေသည် အနီးရှိတိုင်ကို ဖတ်လေတော့သည်။ ဆရာမုန်း စိတ်ထဲမှ ကြိတ်၍ပြုံးမိလေသည်။
"ဟေ့ မောင်ချစ်ဆွေ တိုင်မဖတ်နဲ့။ ဒီလာ လက်ဝါးဖြန့်"
"ခင်ဗျာ"
"လက်ဝါးဖြန့်လေ"
သည်တော့မှာ ချစ်ဆွေ လက်ဝါးဖြန့်တော့သည်။ ဆရာမုန်းသည် သစ်သားပေတံနှင့် ခပ်စပ်စပ်လေးရိုက်လိုက်၏။ ထိုအခါ ကျောင်းသားအားလုံး၏ မျက်နှာသည် ပြုံးစိစိဖြစ်ကုန်သည်ကို ဆရာမုန်း သတိချပ်မိလိုက်သည်။

နှစ်ဦးစလုံး အပြစ်ပေးခံရပြီး သူတို့နေရာသို့ ပြန်ထိုင်ကြသည်။ ဆရာမုန်းသည် ပေတံနှင့် ရိုက်နှက်အပြစ်ပေးခြင်းနှင့် ပတ်သက်၍ သူတို့နှစ်ဦးနှင့်တကွ ကျောင်းသားများ မည်သို့တုန့်ပြန်သဘောထားမည်ကို မသိမသာ အကဲခတ်ကြည့်နေမိသည်။ ချစ်ဆွေရော ကိုရင်တင်မြင့်ပါ မျက်နှာမညှိုးကြ။ ကြောက်လန့်ဟန်မပြ။ သစ်သားပေတံနှင့် လက်ဝါးကို ရိုက်လိုက်သည်နှင့်ပတ်သက်၍ ဆုလာဘ်ကြီးတပါးဟု သဘောထားနေသလောမသိ။ လက်ဝါးကလေးကို တဖြန့်ဖြန့်နှင့် အနီးရှိကျောင်းသားများကို ကြွားဝါပြနေတော့သည်။ ဆရာမုန်း သဘောပေါက်လိုက်မိသည်။

တိုင်မှာဖတ်ပြီး တင်ပါးဝယ် အရှိုးထင်အောင် အရိုက်ခံကျင့်ရှိထားသူများအနေဖြင့် လက်ဝါးကို ပေတံနှင့်ရိုက်သည်မှာ သူတို့အတွက် အပျော့ဟု ထင်ကြတော့မည်။ အယားပျောတ်သလောက်ပင် အောက်မေ့ကြလေမည်။ ပေတံကလေးနှင့် ရိုက်သလောက်ကို ရယ်တာပေါ့ ရယ်တာပေါ့ဟု ဝမ်းထဲမှာ ကြိတ်ပြီး ကြွေးကြော်နေကြမည်လောမသိ။ ရိုင်းရိုင်းပင် ဥပမာ ပေးရချေတော့မည်။ ငရဲကလာသူ ပြာပူကို ကြောက်လိမ့်မည်မဟုတ်တကား။ မည်သို့ဆောင်ရွက်ရပါမည်နည်း။ ဆရာတော်ကဲ့သို့ ရိုက်ရမည်လော။ ဆရာမုန်း မရိုက်လို။ မရိုက်လျှင်လည်း ကြောက်ကြလိမ့်မည်မဟုတ်။ ညှာတာရိုက်ပါလျှင်လည်း နကန်မနာသော နွားထုံကဲ့သို့ ရှိချိမ့်မည်။ လောလောဆယ်တွင် သူတို့ကို ခြောက်လှန့်ကြည့်ရဦးမည်။

"အားလုံးနားထောင်ကြကွဲ့။ စာသင်ချိန်မှာ စည်းကမ်းပျက်သူတွေကို ဆရာ အရေးယူရလိမ့်မယ်။ ခုနက မောင်ချစ်ဆွေနဲ့ မောင်တင်မြင့်ကို ရိုက်တာဟာ တကယ်ရိုက်တာ မဟုတ်သေးဘူး။ စတိလောက်သာ ဖြစ်ပါတယ်။ နောက်နောင်ဆိုရင် မင်းတို့ကို ဆရာတော်လို ရိုက်ရပါလိမ့်မယ်။ ဆရာက အပြစ်မပေးချင်တဲ့အခါ ဆရာတော်ဆီကို ပို့ရပါလိမ့်မယ်။ ဆရာတော်က စည်းကမ်းဖောက်ဖျက်သူဟူသမျှကို သူ့ဆီပို့ဖို့ မှာထားပါတယ်"

အားလုံး ငြိမ်ကျသွားတော့သည်။ သူတို့၏ မျက်နှာတိုင်းတွင် ကြောက်ရွံ့သည့် လက္ခဏာများ ပေါ်လာကြသည်ကို တွေ့မြင်လိုက်ရတော့သည်။

XXXXX

(၁၉၇၉ ခုနှစ် စာပေဗိမာန်စာမူဆုရ ဝတ္ထုတိုပေါင်းချုပ် ပထမဆုရ စာရေးဆရာ ကြူရတနာ မောင်မြကြိုင်၏ ဆရာမုန်း ဝတ္ထုတိုများ စာအုပ်မှ ဝတ္ထုတိုများကို နှစ်သက်သောကြောင့် ကူးယူဖော်ပြပါသည်။)